Og þess vegna var þjáning Krists algjörlega óþörf
Eigi leið þú oss í freistni segir í faðirvorinu. Girnist þú páskaegg en ert að reyna að standast freistinguna? Ég segi verði þér að góðu.
Gleðilegan laugardag.
Svo virðist sem æ fleiri telji fyrirmyndarríkið stað þar sem allir eru sammála. Woke-verjum er legið á hálsi fyrir að líða ekki aðrar skoðanir en sínar eigin; Donald Trump bannar bækur, mótmæli og fjölmiðla; bresk stjórnvöld hyggjast slaufa með lögum vinnustaðagríni.
Af hverju stafar þessi djúpstæða þörf fyrir að aðrir séu sammála okkur? Og hvað hefur þessi þörf með páskaegg að gera?
Flest lítum við á sjálf okkur sem upplýstar skynsemisverur. Við myndum okkur pólitískar skoðanir byggðar á staðreyndunum og hafi einhver uppi betri rök skiptum við um skoðun. Ekki rétt?
Rangt.
Þegar taugavísindamenn sýndu þátttakendum í rannsókn sannanir þess að þeir hefðu rangt fyrir sér mældist viðbragð í heila þeirra „svipað því og gerðist ef maður gengi í gegnum skóg og rækist skyndilega á björn.“
Myndir sem teknar voru af heilum þátttakenda í MRI-skanna sýndu að þær heilstöðvar sem ákvarða sjálfsmynd, stýra tilfinningasvörun og meta hættu verði virkar þegar stjórnmálaskoðanir okkar eru dregnar í efa.
Að sögn Jonas Kaplan, eins þeirra sem stóðu að rannsókninni, er það ekki sannleikurinn sem við stöndum vörð um þegar við rökræðum um stjórnmál heldur ættbálkurinn. Að falla í hópinn skiptir meira máli þegar kemur að því að lifa af heldur en að fara rétt með staðreyndir.
„Stjórnmálaskoðanir eru eins og trúarskoðanir,” útskýrði Kaplan. „Þær eru annars vegar hluti af sjálfsmynd okkar, hins vegar mikilvægar þegar kemur að því að ákvarða hvaða samfélagshópi við tilheyrum ... Íhugi maður að breyta um stjórnmálaskoðun er maður í raun að íhuga að breyta um sjálf.“
Sælutilfinning um páska
Í tilefni páska hafði ég ætlað mér að skrifa hið fyrirmyndar fréttabréf. En þar sem rannsóknir sýna að okkur finnst ógnvænlegt að lesa efni sem inniheldur stjórnmálaskoðanir sem stangast á við okkar eigin er slíkt ógerningur.
En kannski er ekki öll von úti.
Sömu rannsóknir sýna að lestur efnis sem við erum sammála vekur með okkur sælutilfinningu, því slíkur lestur eykur magn taugaboðefnisins dópamín í heila.
Þótt ég geti ekki, í tilefni páska, boðað lesendum fögnuð sem allir geti sammælst um get ég komið til móts við þá með öðrum hætti.
Fátt fangar betur páskana en súkkulaði. Súkkulaði, eins og stjórnmálaskoðanir sem eru okkur þóknanlegar, eykur framleiðslu dópamíns í heila.
Í stað þess að lesa lengra hvet ég ykkur því einfaldlega til að fá ykkur páskaegg.
HRÆSNI VIKUNNAR
Eiginmaður minn gerðist nýverið hjóltönn í gangverki heimskapítalismans er hann hóf störf hjá alþjóðlega stórfyrirtækinu Ipsos, sem gerir skoðanakannanir um allt milli himins og helvítis.
Ég gægist stundum yfir öxlina á honum til að fá innsýn inn í þjáningu heimssálarinnar.
Samkvæmt könnun Ipsos segist mikill meirihluti fólks styðja tjáningarfrelsið. En þegar þátttakendur standa frammi fyrir umdeildum fullyrðingum kemur í ljós að stuðningurinn er aðeins í orði. Íhaldsmönnum líkar mjög illa þegar þjóðartákn eru vanvirt en frjálslyndum líkar mjög illa þegar minnihlutahópar eru vanvirtir.
Ekki einu sinni krossfesting getur frelsað okkur undan eigin hræsni. Þess vegna var þjáning Krists algjörlega óþörf.
PISTILL VIKUNNAR
Páskapistillinn í Heimildinni fjallar ekki um þjáningu Krists heldur þjáningu mannsins.
PISTILINN MÁ LESA HÉR:
Megi páskakaffið verða þér til upprisu.
Góða helgi.
Sjáðu nú til, þjáningu Krists má skilja þannig, að hjá okkur, fylgjendum hans (já, þú ert þar), hafi fórnin verið framin í eitt skipti fyrir öll - og því ónauðsynlegt að fórna mönnum og dýrum eftir það. Áður var það gert í miklum mæli. Þjáning Krists var því vissulega þörf og nýtist okkur daglega.